महावितरण (MSEDCL) मार्फत सध्या रत्नागिरी व सिंधुदुर्ग जिल्ह्यांमध्ये घरगुती व व्यावसायिक वीज ग्राहकांसाठी नवीन टीओडी स्मार्ट मीटर बसवण्याचे काम युद्धपातळीवर सुरू आहे. हे मीटर पारंपरिक मीटरपेक्षा अधिक प्रगत असून, ग्राहकांना त्यांच्या वीज वापरावर रियल टाईम नियंत्रण ठेवण्याची संधी देतात. या नवीन प्रणालीमुळे ग्राहकांचे वीजबिल कमी होण्यास मदत होणार असून, संपूर्ण प्रक्रिया अधिक पारदर्शक होणार आहे.
टीओडी स्मार्ट मीटर म्हणजे काय?
टीओडी म्हणजे Time of Day. हे मीटर वीज वापराच्या वेळेनुसार दर ठरवतात. उदाहरणार्थ, दिवसा वीजेचा पुरवठा जास्त प्रमाणात उपलब्ध असल्याने त्या वेळेस दर कमी असतो. यामुळे जर ग्राहकांनी दिवसा जास्तीत जास्त वीज वापर केला, तर त्यांचे बिल तुलनेत कमी येते.
टीओडी स्मार्ट मीटरद्वारे ग्राहकांच्या मोबाईलवर त्यांच्या वीज वापराची दर तासानुसार माहिती उपलब्ध होते. यामुळे प्रत्येक युनिटचा हिशोब ठेवता येतो आणि अचूक मीटर रीडिंग नोंदवले जाते. वीज चोरी थांबवण्यासाठीही हे मीटर अत्यंत उपयुक्त ठरत आहेत.
ग्राहकांवर कोणताही आर्थिक भार नाही
महावितरणने स्पष्ट केले आहे की हे स्मार्ट मीटर बसवण्याचा कोणताही खर्च ग्राहकांकडून आकारला जात नाही. हा संपूर्ण खर्च महावितरण स्वतःच्या महसुलातून करत आहे. टीओडी स्मार्ट मीटर बसवण्यासाठी नियुक्त केलेल्या ठेकेदारांना मीटरची 10 वर्षे देखभाल करण्याची जबाबदारी देण्यात आली आहे.
म्हणजेच, ग्राहकांना कोणताही अतिरिक्त खर्च किंवा देखभाल शुल्क द्यावे लागत नाही. त्यामुळे या उपयुक्त सुविधेला विरोध करण्याचे कारण नाही.
स्मार्ट मीटरमुळे ग्राहकांचा फायदा कसा होतो?
- रियल टाईम वीज वापराची माहिती: मोबाईल अ‍ॅपद्वारे ग्राहकांना दर तासाला वीज वापर किती झाला याची माहिती मिळते.
- बिलावर नियंत्रण: वापर लक्षात ठेवून वीज वापर नियंत्रित करता येतो आणि बिल कमी येते.
- अचूक बिलिंग: चुकीच्या रीडिंगमुळे होणारे बिलाचे तक्रारी थांबतात.
- टाइम ऑफ डे सवलती: दिवसा कमी दराने वीज वापरून वीज बिलात बचत करता येते.
- पारदर्शक प्रक्रिया: मीटर बदल, रीडिंग व बिल यामध्ये कोणताही मानवी हस्तक्षेप नाही.
रुफटॉप सोलर आणि सौर कृषी योजनेचा स्मार्ट वापर
राज्यात रुफटॉप सोलर, मुख्यमंत्री सौर कृषी वाहिनी योजना अशा योजनांमुळे दिवसा मोठ्या प्रमाणात वीज उपलब्ध असते. त्यामुळे महावितरणने वीज दरात सुधारणा करून दुपारी वीज दरात 80 पैसे ते 1 रुपया इतकी सवलत देण्याचा प्रस्ताव सादर केला आहे, जो वीज नियामक आयोगाने मान्य केला आहे.
पण या सवलतीचा फायदा फक्त टीओडी सुविधा असलेल्या स्मार्ट मीटरमधूनच मिळू शकतो. जुन्या मीटरमध्ये ही सुविधा नसल्याने ग्राहकांना दिवसा स्वस्त वीज दराचा लाभ मिळत नाही.
अफवांना बळी न पडता सहकार्य करा
रत्नागिरी व सिंधुदुर्ग जिल्ह्यांतील काही भागात चुकीच्या माहितीमुळे काही नागरिक टीओडी स्मार्ट मीटर बसवण्यास विरोध करत आहेत. मात्र महावितरणने यावर स्पष्टीकरण देऊन सांगितले आहे की, या अफवांमध्ये कोणतेही तथ्य नाही. मीटर पूर्णपणे सुरक्षित असून, ग्राहकांना कोणतीही हानी पोहोचवत नाहीत. उलट, हे मीटर ग्राहकांच्या फायद्याचे आहेत.
पारदर्शकतेसाठी महावितरणची जनजागृती मोहीम
सध्याचे पारंपरिक मीटर आणि टीओडी स्मार्ट मीटर यातील फरक समजावा म्हणून महावितरणने रत्नागिरी व सिंधुदुर्ग मंडलातील विविध कार्यालयात डेमो मीटर लावले आहेत. या डेमो सेटअपमधून ग्राहकांना दोन्ही मीटरमधील वीज वापर, युनिट नोंद व बिलिंग प्रक्रियेचे प्रत्यक्ष प्रात्यक्षिक पाहता येते. यामुळे ग्राहक आपले शंका समाधान करू शकतात.
स्मार्ट मीटर म्हणजे स्मार्ट ग्राहक
महावितरणचा टीओडी स्मार्ट मीटर उपक्रम म्हणजे वीज वितरण क्षेत्रात एक क्रांतिकारी पाऊल आहे. या मीटरमुळे केवळ वीज चोरीवर अंकुश बसत नाही, तर सामान्य ग्राहकांनाही वीज वापराचे व्यवस्थापन करता येते. ग्राहकांनी या आधुनिक तंत्रज्ञानाचा स्वीकार करून आपला वीज वापर अधिक सुज्ञपणे करावा.
महावितरणकडून एकच विनंती – अफवांना बळी पडू नका आणि टीओडी स्मार्ट मीटर बसवण्यास सहकार्य करा!
