पिंपरी-हिंजवडी | ९ जुलै २०२५
लग्नाचं आमिष दाखवत वेळोवेळी शारीरिक संबंध ठेवून गर्भवती झालेल्या तरुणीचा गर्भपात तिच्या नकळत रबडीतून गोळी मिसळून केल्याची संतापजनक घटना पिंपरीतील हिंजवडी परिसरात उघडकीस आली आहे.
या प्रकरणी आदर्श मेश्राम (वय 28, रा. लक्ष्मी चौक, हिंजवडी, मूळ रा. बल्हारशहा, जि. चंद्रपूर) याच्याविरोधात हिंजवडी पोलिस ठाण्यात गुन्हा दाखल करण्यात आला आहे.
प्रेमाच्या नावाखाली फसवणूक
पोलीस सूत्रांनुसार, आरोपी आदर्श मेश्राम याने संबंधित 28 वर्षीय तरुणीशी प्रेमसंबंध ठेवत लग्नाचे आमिष दाखवून वारंवार शारीरिक संबंध प्रस्थापित केले. काही महिन्यांनंतर तरुणी गर्भवती राहिली, त्यानंतर तिच्या संमतीशिवाय रबडीत गर्भपाताची गोळी मिसळून ती जबरदस्तीने खाऊ घालण्यात आली.
या प्रकारामुळे तिचा गर्भपात झाला. त्यानंतर आरोपीने लग्नास साफ नकार दिला, आणि पीडितेची फसवणूक केल्याचे स्पष्ट झाले.
पीडितेची तक्रार, पोलिसांनी घेतली दखल
आपली फसवणूक झाल्याचे लक्षात आल्यानंतर पीडित तरुणीने थेट हिंजवडी पोलिस ठाण्यात धाव घेतली आणि तक्रार नोंदवली. यावरून आदर्श मेश्राम याच्याविरोधात फसवणूक, जबरदस्ती, आणि महिलांचा विश्वासघात यासह विविध गंभीर कलमांतर्गत गुन्हा दाखल करण्यात आला आहे.
या प्रकरणाचा तपास महिला सहायक पोलीस निरीक्षक जाधव करत आहेत.
