मुंबई – मुंबई महानगरपालिका (BMC) निवडणूक 2025 ची रणधुमाळी सुरू झाली आहे. महापालिकेच्या 227 प्रभागांपैकी 150 प्रभागांत उमेदवार उतरवण्याची भाजपा तयारीत आहे, तर दुसरीकडे शिंदे गटाने 2017 मध्ये जिंकलेल्या 84 प्रभागांसह मनसेतून शिवसेनेत आलेल्या 7 नगरसेवकांच्या 91 प्रभागांवर दावा ठोकला आहे. याशिवाय 20-25 प्रभागांसाठीही शिवसेना आग्रही असून हे प्रभाग कोणत्याही परिस्थितीत सोडणार नसल्याचा पवित्रा घेतला आहे.
2017 चा निकाल आणि आजचा समीकरण
- शिवसेना – 84
- भाजपा – 82
- काँग्रेस – 31
- राष्ट्रवादी काँग्रेस – 9
- मनसे – 7
- समाजवादी पार्टी – 6
- एमआयएम – 2
- अपक्ष – 5
2017 मध्ये शिवसेना सर्वात मोठा पक्ष ठरली होती. मात्र 2025 मध्ये भाजपाने 150 प्रभागांत उमेदवार उतरवण्याची तयारी दर्शवली आहे. यामुळे उर्वरित 77 प्रभागांमध्ये राष्ट्रवादी आणि शिवसेनेला जागा वाटून घ्याव्या लागतील. राष्ट्रवादीला 20 प्रभाग दिल्यास शिवसेनेला फक्त 57 प्रभाग मिळतील, ज्याला शिवसेना तयार होण्याची शक्यता कमी आहे.
महायुतीत जागावाटपावर तणाव
- शिवसेना – किमान 100+ प्रभागांसाठी आग्रही
- भाजपा – 125-130 प्रभागांची मागणी
- राष्ट्रवादी काँग्रेस – 15-20 प्रभागांची अपेक्षा
या समीकरणामुळे महायुतीत जागावाटपावरून मोठा संघर्ष होण्याची शक्यता आहे. महापौर पदासाठी भाजपाची जोरदार मोहीम सुरू आहे, तर शिंदेसेनाही महापालिकेवर आपली पकड कायम ठेवू इच्छिते.
नेत्यांची मोर्चेबांधणी
- उपमुख्यमंत्री एकनाथ शिंदे यांनी शिवसेनेच्या सर्व माजी नगरसेवकांना पुन्हा संघटनेत सामावून घेतले आहे.
- मुंबईतील 36 विधानसभा मतदारसंघांमध्ये विद्यमान आमदारांना निवडणुकीची जबाबदारी दिली आहे.
- भाजपाकडूनही मुंबई महापालिकेत महापौर बसवण्याचा नारा दिला जात आहे.
राजकीय समीकरणे
जर भाजपा 150 प्रभागांत लढली आणि राष्ट्रवादीला 20 प्रभाग दिले, तर शिवसेनेला आपल्या काही जागांवर तडजोड करावी लागू शकते. महायुती टिकवायची असेल तर जागावाटपात शिवसेनेने काही जागा सोडण्याची शक्यता राजकीय तज्ज्ञ व्यक्त करत आहेत.
